Í fjør var navnið á 17 ára gamla Einari Hansen neyvan nakað, sum fólk uttan fyri NSÍ bitu nakað serligt merki í. Alt í alt gjørdist talan bara um tríggjar upptraðkanir á besta liðnum hjá vespunum hetta kappingarárið, og tó at evnini vóru hampuliga sjónlig, so var hetta altso ikki nakað, sum stórvegis merki varð bitið í. Í øllum førum ikki hjá teimum, sum ikki fylgdu NSÍ heilt nær.
Í ár hevur talan tó verið um stóra broyting í so máta. Longu í næsta dystinum í Formula-deildini varð Sjúrður Jacobsen skaddur, og so var tørvur á nýggjum manni at røkta plássið, sum Sjúrður frísparkssjúttin av Langanesi hevur sitið rimmar fastur á í skjótt drúgt áramál.
Og hetta gjørdist møguleikin hjá Einari. Uttan stórvegis hóvasták spældi hann seg alt fyri eitt inn í hitan við støðugt góðum avrikum, sum annars plaga at hoyra meira royndum spælarum til. Og í dag snýr tosið í Runavík seg meira um, hvørt Sjúrður yvir høvur fær plássið aftur, heldur enn nær hann verður tøkur aftur.
Sjálvur tykist Einar tó taka tað heilt róligt. Og í øllum førum vóru beinin plantað væl og virðiligani á jørðini, tá vit fingu orð á hann eftir dystin á Eiði.
- Eg havi bara roynt at arbeitt fyri mínum møguleika. Og so havi eg roynt at tikið av, nú tá hann kom.
Og nógv hava tosað um, at tú nú situr væl og virðiliga á plássinum. Kennir tú tað eisini soleiðis sjálvur?
- Tað veit eg ikki. Eg royni sum sagt at arbeiða fyri mínum kjansi. Men eg haldi í øllum førum ikki, at eg verið settur á beinkin alt fyri eitt, sum næsti maðurin er tøkur.
Tá ein ungur spælari somikið brádliga trínur á pallin, plagar tosið um fótbólt uttan fyri landoddarnar eisini at fáa ferð á. Og soleiðis tykist tað eisini vera við Einari.
Sjálvur vil hann tó ikki siga nakað serligt um hetta. Heldur ikki tá tað verður spurt beinleiðis, um tað ikki er nakað um tosið, tá sagt verður, at tað ikki er við NSÍ, at hann skal spæla, tá vit koma út í juli mánað.
- Tað kann kanska verða, at eg missi onkrar dystir tá, men tað fái eg so ikki sagt nakað um í løtuni, sigur fryntligi og næstan smædni unglingin at enda.
Hvussu er og ikki, so er einki at ivast í, at verður talan um lítla fráveru, so er hendan bara fyribils. Tað tykist í øllum, sum er róliga medferðin garantur fyri, at fótbóltsevnini verða gagnnýtt optimalt, og verða tey tað, so verður kanska heldur ikki so øðiliga leingi, áðrenn landsliðsvenjararnir kunnu royna at brúka Súna Olsen longur frammi á vøllinum.
