Kvinnuhondbóltur
Tað vóru ikki meira enn fimm sekund eftir av botndystinum millum Tjaldur og Stjørnuna, tá dramatikkurin í Runavík toppaði.
Maria við Neyst, sum stutt frammanundan hevði skoraði eitt týdningarmikið mál fyri Stjørnuna, var á veg ígjøgnum í allarsíðsta álopinum í dystinum, tá Beinta Joensen hjá Tjaldri tók í armin á henni.
Revsingin var burturvísing til Beintu og brotskast til Stjørnuna, samstundis sum støðan var 23-23.
Dysturin skuldi sostatt avgerast við beinleiðis duell millum málverjan hjá Tjaldri, Mariu Vlasceanu, og toppskjúttan hjá Stjørnuni, Danijelu Ercevic.
Og tað bleiv Danijela, sum kundi spæla upp á sálarligu yvirvágina, sum Stjørnan hevði vunnið sær í seinna hálvleiki, og tískil endaði dysturin 24-23 til Stjørnuna.
Ein dramatiskur endi í einum dramatiskum og spennandi dysti, sum til tíðir eisini var væl spældur.
Men hetta var ikki tann endin, ið alt peikaði á ein góðan hálvan tíma frammanundan, tá liðini fóru til hálvleiks, tí tá var Tjaldur væl og virðiliga á odda.
Sannførandi heimalið
Tjaldur átti fyrra hálvleik við rubb og stubb og vann hann sannførandi við seks málum í yvirskoti.
Stjørnan fylgdi við tað fyrsta korterið, men so dróg Tjaldur bara frá og økti um sína leiðslu, uttan at tað eydnaðist gestunum úr Klaksvík at svara munagott aftur.
Serliga vóru tað tær báðar útlendsku hjá heimaliðnum, Milica Ergic og Lenka Ribaric, ið skaraðu framúr og sluppu til skot í heilum móti málinum hjá Stjørnuni.
Tjaldur vísti hugflog og áræði, og tað var heilt týðiligt, at spælararnir vóru greiðir yvir, at dysturin skuldi vinnast, um Tjaldur ikki skuldi smokka uppaftur longur niður á aftasta plássinum á stigatalvuni.
Hinvegin bar lítið til hjá Stjørnuni, ið serliga hevði trupulleikar við at fáa verjuna upp at koyra. Tær hjá Tjaldri sluppu væl framat og kundu hótta við skotum so at siga alla tíðina.
Vend kom í
Sjálvt um tað sá svart út hjá Stjørnuni, var tað síðsta framvegis ikki farið, og spælararnir løgdu hart út eftir steðgin og skoraðu beinanvegin fýra mál, uttan at Tjaldur fekk fótin fyri seg.
Serliga verjuparturin var munandi betur skipaður hjá Stjørnuni eftir steðgin, og merkisvert er, at Lenka Ribaric í seinna hálvleiki einki mál fekk aftrat og Milica Ergic bara eitt.
Spakuliga arbeiddi Stjørnan seg inn í dystin, og hóast Tjaldur stríddist fyri lívinum, bar ikki til at halda fast um leiðsluna, liðið hevði vunnið sær í fyrra hálvleiki.
Tjaldur mansvardi av og á Danijelu Ercevic og Natasju Stamenkovic, men uttan at tað steðgaði Stjørnuni, tí so tóku hinar á liðnum bara yvir og syrgdu fyri, at málini komu og at moralurin var intaktur.
Tá bara tíggju minuttir vóru eftir, stóð á jøvnum 19-19, og tí gjørdist tann síðsta langa løtan í dystinum ein dramatisk og spennandi uppliving fyri bæði spælarar og áskoðarar.
Stjørnan vildi ikki sleppa takinum, tá liðið fyrst hevði fingið fatur í Tjaldrinum, og dysturin kundi sum so farið báðar vegir ella verið endaður javnur.
Og so var tað, at brotskastið í allarsíðstu sekundunum avgjørdi alt, og tí varð tað Stjørnan, ið kundi fara avstað aftur við øllum.
Tjaldur-Stjørnan 23-24 (15-9)
Málskjúttar:
Tjaldur: Milica Ergic 6, Beinta Joensen 5 (1), Lenka Ribaric 4, Oddvá Fossdalsá 3, Mona Langgaard 3 (1), Kristine Ellingsgaard 1
Stjørnan: Danijela Ercevic 12 (4), Rannvá Andreasen 4, Una Olsen 4, Natasja Stamenkovic 2, Súsanna Hansen 1, Maria við Neyst 1
Brotskøst: Tjaldur 5, Stjørnan 6
Útvísingar: Tjaldur 3, Stjørnan 1
Burturvísing: Tjaldur 1
Dómarar: Rúni Mohr og Ragnar Simonsen
