Leygardagin var triðja og seinasta steypakappingin í amboðsfimleiki í Fimi í Havn. Frammanundan høvdu kappingar verið leygardagin 5. februar og leygardagin 22. januar.
Tó vóru tað bert konufólk, ið vóru við til ta fyrstu kappingina, so tí høvdu mannfólkini so mikið meira at gera í aðru kappingini, tí tá vóru tríggjar greinir á skránni hjá teimum ein og sama dag.
Orsøkin til tað var, at tað eydnaðist ikki at fáa dómarar til kappingarnar hjá monnunum beinanvegin, so tí gjørdust tað bara tvær steypakappingar hjá monnum, mansunglingum, dreingjum og smádreingjum.
Niðanfyri hava vit tikið saman um allar tríggjar steypakappingarnar, so ein hóming fæst av, hvørjir fimleikarar serliga hava útmerkað seg. Harumframt hava vit eisini aðrastaðni á hesi síðu úrslitini hjá trimum teimum bestu í hvørjari grein frá steypakappingini leygardagin.
Kristina var best
Hjá kvinnunum var Kristina Toftegaard úr Havnar Fimleikafelag tann stóri vinnarin í steypakappingunum, tí hon vann í trimum av fýra greinum. Leygardagin vann hon á gólvi, umframt at hon eisini vann kappingarnar í lopi og á bita. Í forskotnari barr gjørdist tað hinvegin Katrin Wardum, somuleiðis úr Havnar Fimleikafelag, ið vann.
Øssur Debes Eiriksfoss hevur verið tann drúgvasti hjá monnunum. Hann vann leygardagin bæði í ringum og lopi, umframt at hann fyrr hevði vunnið í rekk. Rósing Dam hevði frammanundan vunnið á gólvi og í barr. Báðir eru úr Havnar Fimleikafelag.
Í steypakappingini leygardagin var Eyðvør W. Samuelsen úr Ljósinum best hjá kvinnuunglingum á gólvi, men annars eydnaðist Anniku B. Hansen úr Støkk at vinna bæði í forskotnari barr og á bita í undanfarnu kappingunum, og Bára Persson úr Havnar Fimleikafelag vann ta einu kappingina í lopi.
Kappingin hjá mansunglingum hevur verið millum tveir fimleikarar úr Havnar Fimleikafelag, Pætur Jacobsen og Sofus Andreasen, og teir hava vunnið aðru hvørja grein. Leygardagin vann Pætur í lopi og Sofus í ringum, men í fyrru kappingini vann Pætur vunnið á gólvi og í barr, og Sofus vann í rekk.
Vann fimm av seks
Marianna G. Eystberg úr Ljósinum vann á gólvinum hjá gentum leygardagin. Í aðru steypakappingini vann Bjørt H. Joensen úr HF í forskotnari barr og lopi, og Lív B. Árting vann á gólvinum í tí fyrstu av teimum trimum kappingunum.
Bartal Wardum úr Havnar Fimleikafelag var stóri slúkurin hjá dreingjum, tí hann vann tilsamans fimm av seks greinum. Hann vann á gólvi, í rekk, barr, ringum og lopi, men leygardagin vann Rani Petersen úr Havnar Fimleikafelag í lopi.
Hjá smádreingjum var Hannes Agnarson úr Havnar Fimleikafelag um vikuskiftið bestur í ringum og beinsveiggi, og í fyrru steypakappingini hjá teimum vann hann eisini í rekk og barr. Aron Jacobsen úr Havnar Fimleikafelag var leygardagin bestur í lopi, og hann vann eisini á gólvi í tí fyrru steypakappingini.
