Í ár hevur venjingarmiðstøðin »Frag og Fimi« 15 ár á baki, og í hesum sambandi verður skipað fyri kapping komandi leygardag.
Talan er um eina kapping innan styrkilyft, har luttakararnir skulu royna seg í greinunum, Beinbend, Bonkpress og Rættstøðulyft.
Flestu luttakararnir venja regluliga í Fragd og Fimi, men hetta merkir tó ikki, at stóru føroysku risarnir verða við í kappingini. Hetta tí tað helst hevði tikið allan spenningin burtur, um eitt nú Regin Vágadal skuldi luttikið.
Í mun til kropsvekt
Talan er um eina kapping, har allir vektflokkar dystast móti hvørjum øðrum, og tískil verða kiloini, sum einstøku luttakararnir megna at flyta, umroknað í lutfalli til kropsvektina. Sostatt verður vinnarin tann, sum megnar at lyfta flestu kiloini í mun til kropsvektina.
Tá sterku menninir venja, verður hetta aloftast gjørt í hølunum hjá Fragd og Fimi, men kappingin verður tó ikki hildin í venjingarhølunum. Ístaðin verður tað bilhøllin hjá Reyni Service, sum verður karmur um tiltakið. Seinast kappast varð í hesi ítróttargrein, á heysti 1998, fór kappingin eisini fram uppi í Hoyvíkini, og fyrireikararnir vóru væl nøgdir við umstøðurnar tað ferðina. Bæði tí bilhøllin er væl rúmligari enn venjingarhølini, men eisini tí teir á henda hátt sleppa úr vanligu venjingarumstøðunum.
