- Hetta er ógvuliga harmiligt.
Hentzar Steingri?msson í Thor Shipping, harmast um ætlanina hjá samgonguni at broyta skattalógina fyri at gera umstøðurnar hjá teimum, sum sigla og arbeiða uttanlands betri.
Sjálvur umboðar hann SMS, Simon Møkster Shipping AS, sum er eitt stórt Reiðarí í norsku frálandavinnuni.
Síðani 2005 hevur felagið eisini verið í okkara altjóða Skipaskráseting, FAS og nú hevur tað fýra skip undir føroyskum flaggi í FAS.
- Tilsamans sigla 95 mans við hesum skipunum og teir eru allir føroyingar.
Ein stoppari
Hentzar Steingri?msson sigur, at SMS hevur ætlað at økja um virksemið í Føroyum.
Men verður nýggja lógin hjá samgonguni samtykt, verður hetta av ongum.
- Í longri tíð hava vit havt ein ítøkiligan trupulleika og tað er, at nógvir, fyri ikki at siga allir av føroysku manningum, hava søkt um at sleppa at umborð á okkurt av skipunum hjá SMS í Noregi.
- Okkara føroysku sjómenn ringja dagliga til okkara og biðja um at verða fluttir yvir á okkurt norskt skip.
- Tað vilja teir heldur enn at sigla við okkara fýra skipum undir FAS.
Hentzar Steingri?msson staðfestir, at orsøkin til tað er, at skatturin í Noregi er nógv lægri.
Hann staðfestir somuleiðis, at verður uppskotið hjá samgonguni samtykt, fer tað heilt avgjørt at seta ein stoppara fyri framtíðarætlanunum hjá SMS í Føroyum, tí nú verður munurin á skattinum í Noregi og í Føroyum enn størri enn hann longu er.
Rýma
Hentzar Steingri?msson dugir eisini væl at hugsa sær, at ein avleiðing verður, at skipini fara undir fremmant flagg.
- Fer tað at knípa at fáa manning og føroyingar ikki vilja sigla við sínum egnu skipum, er ikki nógv annað at gera, staðfestir hann.
- Tað loysir betri hjá føroyingum at sigla í Noregi, tí føroyskir myndugleikar leggjast á føroyingar, sum sigla í Føroyum, staðfestir hann turrisliga.
Hetta harmast hann almikið um, tí allar fráboðanir frá politisku skipanini hesi seinastu árini, hava verið, at FAS er ein skipan, sum hevur meginparturin av politisku skipanini tekur undir við.
Hann hevur fingið at vita frá grannskoðarum, at er endamálið at gera skattaviðurskiftini hjá føroyingum uttanlands, greiðari, ber tað væl til, uttan at leggjast á FAS.
- Tað er bara ein spurningur um, at fólk, sum hava skil fyri skattateknikki, seta seg saman og finna eina loysn.
LES EISINI GREININA: LØNIRNAR Í FØROYUM TRÝSTAR UPPEFTIR
