Tað hevur verið nógv fólk í býnum í nátt - men tey hava verið í góðum lag.
Løgreglan sigur, at tað hevur verið stak friðarligt í nátt.
Men heilt arbeiðsleys verður løgreglan sjáldan og í nátt varð fráboðað, at herverk var framt á ein bil, sum stóð parkeraður í Gundadali í Havn.
Bakrúturin var brotin, men løgreglan veit einki um, hvør gerningsmaðurin er.
Ein annar maður boðaði eisini frá, at onkur hevði sligið hann. Hann hevði verið á Landssjúkrahúsinum til kanningar, áðrenn hann boðaði løgregluni frá. Hann visti ikki, hvør tað var, sum sló, men hann var ávirkaður av rúsdrekka, so hann skal aftur á løgreglustøðina at greiða frá, tá ið tað er runnið av aftur.
Annars kannaði løgreglan skeinkistøð í Havn, Eysturoy og í Klaksvík í nátt, men har var alt, sum tað skuldi.
