Hetta er fimta árið á rað, at spælt verður um Lions-steypið, sum B36 vann í 2007, NSÍ í 2008 og sum HB vann í bæði 2009 og 2010. Av tí at HB er við aftur hesa ferð, kann felagið vinna steypið triðju ferð á rað, meðan EB/Streymur er við fyri triðju ferð, men enn eigur á at vinna tað. Spælt verður um steypið í 10 ár.
Dysturin, sum verður sunnudagin 27. mars klokkan 16, er fyrsti almenni fótbóltsdysturin í kappingarárinum 2011, og atgongumerkjaprísurin er 80 krónur, sum er vanligi taksturin til dystir í Vodafonedeildini. Ikki er óvanligt, at fólk lata størri upphædd, tí endamálið við Stórsteypadystinum er at útvega pening til eitt vælgerandi endamál.
Fyrireikararnir siga, at í hálvleikinum og eftir dystin er møguleiki at fáa ein kaffimunn í FSF-húsinum, og annars verður sjálvandi steypahandan eftir dystin, har Niels Nattestad, økisformaður í Lions Club í Føroyum, og Christian Andreasen, forseti í Fótbóltssambandinum, handa steyp og heiðursmerki, og eisini verður handaður ágóðin frá dystinum til útvalda endamálið.
Stuðla CTD-felagið
Tað er Lions Club í Føroyum, sum saman við Fótbóltssambandinum skipar fyri dystinum, og í ár er avgerð tikin um, at allur ágóðin frá Stórsteypadystinum hesa ferð skal fara til CTD-felagið, sum var sett á stovn í desember 2009.
Felagið røkir felags áhugamál hjá berarum av sjúkuni og familjum teirra, og tað verður gjørt við at veita stuðul og seta í verk tiltøk á økjum, sum almenna heilsu-
verkið ikki fevnir um. Eisini er eitt av endamálunum hjá CTD-felagnum at upplýsa um sjúkuna, sum fyrstu ferð var staðfest í Føroyum í 1995.
CTD, sum er stytting fyri Carnitin Transportør Defekt, er ein sjúka, sum kann arvast frá foreldrum til børn, so tí er ógvuliga umráðandi, at fólk koma at kenna til allar tær fylgjur, hon hevur við sær. Sjúkan er nógv meira útbreidd í Føroyum enn aðrastaðni, so tí stuðlar CTD-felagið eisini vísundaligari gransking av CTD.
