Norðurkorea helt viðlíka og menti ætlanir sínar fyri kjarnorkuvápnum og rakettum alt árið í fjør í stríð við altjóða tiltøk.
Tað er niðurstøðan í eini loyligari ST-frágreiðing, sum tíðindastovan Reuters hevur fingið innlit í.
Frágreiðingin, sum óheft eftirlitsfólk í sambandi við tiltøkini hava gjørt, staðfestir, at norðurkoreanska stýrið í fjør »framleiddi, helt viðlíka kjarnorkuverk og dagførdi undirstøðukervið til balistiskar rakettir«.
Harumframt helt stýrið fram við at leita eftir evnum og tøkni til hesar ætlanir í útlondum, stendur í frágreiðingini.
Árliga frágreiðingin til nevndina fyri tiltøkum móti Norðurkorea undir ST trygdarráðnum kemur fáar vikur eftir, at Joe Biden tók við sum forseti í USA.
Ein talspersónur fyri amerikanska uttanríkisráðið segði í gjár, at umsitingin hjá Biden ætlar sær eina nýggja tilgongd mótvegis Norðurkorea.
Hon umfatar millum annað fulla gjøgnumgongd av »núverandi møguleikum fyri at økja trýstið á Norðurkorea eins og møguleikarnar fyri framtíðar diplomatii«. Gjøgnumgongdin skal fara fram í samstarvi við sameind lond.
/ritzau/Reuters
