Ísraelski verjumálaráðharrin, Shaul Mofaz, sigur nú, at Ísrael hevur ikki slept ætlanini at reka palestinska forsetan, Yasser Arafat, burtur.
Í samrøðu við útvarpið hjá herinum segði Mofaz mánadagin, at stjórnin heldur fast um avgerðina at reka Arafat burtur.
? Vit fara at finna tann rætta dagin og tann rætta háttin, segði Mofaz.
Sambært blaðnum Haaretz tók stjórnin avgerðina aftan á eina røð av palestinskum sjálvmorðsatsóknum í fjør. Blaðið skrivar, at verður avgerðin framd í verki, kann tað annaðhvørt hava við sær, at Arafat verður fluttur av Vestara Áarbakka, ella at hann verður myrdur.
Arafat hevur sitið avbyrgdur í Ramallah á Vestara Áarbakka seinastu trý árini, og altjóða samfelagið hevur ávarað Ísrael ímóti at reka hann burtur ella at beina fyri honum.
