Nú februarmánaði er farin at halla, er hetta eisini tíðin, tá várróðurin á Norðhavinum plagar at byrja.
Fara vit nøkur ár aftur í tíðina, plagdu útróðrarmenn ymsastaðni úr landinum at taka bátar sínar norður um til várróðurin, sum teir róptu tað.
Soleiðis kundu rættiliga nógvir bátar og útróðrarmenn hesa tíðina av árinum leita sær til Eiðis, Oyndarfjarðar og aðrar bygdir norðan fyri at liggja klárir, tá tað viðrar.
Endin av februar, mars og kanska nakað út í apríl er besta snellutíð á Norðhavinum. Tá tað líður longur út, plagar snellufiskiskapurin at taka seg upp aftur vestanfyri.
Nú náttúran tykist vera meira blíð, hvat toski víðvíkur, vóna menn, at várið, sum nú stundar til, fer at roynast við snelluni norðanfyri.
