Spenningur er aftur í amerikanska forsetavalstríðnum, eftir at leiðslan hjá Hillary Clinton, demokratiska forsetavalevninum, er minkað niður í nærum einki seinastu vikurnar.
Í samandráttinum av veljarakanningum hjá Real Clear Politics, lá Hillary Clinton 9. august 7,9 prosent frammanfyri Donald Trump, republikanska valevnið.
Sostatt var lítið, ið bendi á, at Donald Trump hevði nakran møguleika at vinna, men nú fimm vikur seinni, er munurin hjá Real Clear Politics minkaður til 1,8 prosent.
Samstundis vísa tvær nýggjar veljarakanningar í statinum Ohio, at Donald Trump er á odda 5 prosent í statinum, ið higartil hevur verið ov tættur at meta um.
Tað eru tó ikki bara ring tíðindi fyri Hillary Clinton. Nýggjasta veljarakanningin hjá Quinnipiac University, kunngjørd í gjárkvøldið, vísir eina leiðslu til Hillary Clinton á fimm prosent yvir alt landið. Tað er kortini ein munandi minking frá seinastu kanning hjá Quinnipiac University, ið gav demokratiska valevninum eina leiðslu á 10 prosent.
Men hóast Donald Trump hevur minkað nógv um munin seinastu vikurnar, so hevur Hillary Clinton framhaldandi eina greiða leiðslu, har sum tað veruliga geldur, nevniliga í talinum av valumboðum.
Til forsetavalið er tað nevniliga ikki soleiðis, at valevnið við flest atkvøðum vinnur, sum Al Gore mátti ásanna í 2000, tá hann tapti móti George W. Bush, hóast hann hevði fleiri atkvøður. Tað er talið av valumboðum, ið valevnini vinna, sum er avgerandi. Valumboðini verða býtt eftir hvussu valevnini klára seg í teimum ymisku statunum.
Sambært yvirlitinum hjá Real Clear Politics vísa veljarakanningarnar, at Hillary Clinton hevur 55 fleiri umboð enn Donald Trump.
So hóast tað er munandi nærri í prosentum millum valevnini nú, so er framhaldandi mest sannlíkt, at næsti forsetin í USA verður Hillary Clinton.
