Árni Joensen
Tað er stjórnin, sum mælir til sparingarnar í sambandi við uppskotið til fíggjarlóg fyri 2012, men bæði leiðslan á sjúkrahúsinum og læknarnir ávara politikararnar ímóti at samtykkja uppskotið. Eitt nú hava tey mótmælandi víst á, at síðani 2008 er játtanin til Landsspítala minkað 23 prosent, og at starvsfólkini eru næstan 600 færri nú enn undan sparingunum.
Leiðslan á sjúkrahúsinum og læknarnir siga, at tað ber ikki til at spara meiri, uttan at tað fer at skerja tænastuna til sjúklingarnar meiri, enn gjørt er, og at tað fer eisini ávirka trygdina hjá sjúklingunum.
Raka ikki føroyingar
Landsspítali hevur sáttmála við tað føroyska heilsuverkið, sum kann senda føroyskar sjúklingar til Reykjavíkar til viðgerðar. Men bæði leiðslan á Landsspítala og læknaráðið á sjúkrahúsinum siga, at tær ætlaðu sparingarnar fara ikki at raka sjúklingarnar úr Føroyum.
– Sjúklingar úr Føroyum eru vælkomnir higar, og vit fara at geva teimum ta bestu tænastuna og røktina. Í veruleikanum hevur tað uppaftur størri týdning fyri okkum at arbeiða saman við læknum og leiðslu í Føroyum og at styrkja samstarvið, sigur Lilja Stefánsdóttir við Sosialin. Hon er stjóri á skurðdeildini á Landsspítala og hevur ábyrgdina av samstarvinum við heilsuverkið í Føroyum.
Formaðurin í læknaráðnum á Landsspítala, Anna Gunnarsdóttir, ásannar, at hennara limir eru sera misnøgdir við uppskotið um at spara uppaftur meiri næsta ár. Men tað skal ikki raka sjúklingarnar úr Føroyum.
– Tað er kortini greitt, at hetta fer ikki at raka okkara avtalaða samstarv við sjúkrahúsmyndugleikarnar í Føroyum, sigur Anna Gunnarsdóttir við Sosialin. Hon vónar, at tað fer at bera til at økja samstarvið við tað føroyska heilsuverkið.
Anna Gunnarsdóttir sigur seg vóna, at Altingið fer at játta sjúkrahúsinum meiri pengar, enn stjórnin hevur skotið upp.
