Tað var heldur illgrunasamt, tá ið SønderjyskE í seinasta dystinum í Superliga-grundspælinum leygardagin tapti 2-1 ímóti FC Midtjylland við einum máli, sum FC Midtjylland skeyt í 89. minutti.
Orsøkin til, at tað er illgrunasamt, er tí at tapið hjá SønderjyskE tryggjaði teimum pláss í tí eina av tveimum bólkunum um yvirliving og niðurflyting, har teir hava betri útlit til at klára seg væl.
Les eisini: Lótu teir seg tapa?
Í dag hevur SønderjyskE valt at geva øllum spælarunum í felagnum forboð fyri at úttala seg um málið, so leingi sum at ivi verður reistur um, um felagið hevur tapt við vilja ella ikki. Tað boðaði itróttarstjórin í Sønderjyske, Hans Jørgen Haysen, í dag frá fyri donsku heimasíðuni Tv3Sport.
- Samrøður við okkara spælarar eru ikki ein møguleiki í løtuni. Spælararnir skulu verjast. So leingi, sum ein sak koyrir mótvegis okkum, skulu spælararnir á ongan hátt útstillast. Tað eru teir í ríkiligan mun í forvegin, eftir tað sum hendi í dystinum móti FC Midtjylland, sigur Hans Jørgen Haysen.
Tað sokallaða disciplinærinstansið hjá DBU kannar í løtuni, um SønderjyskE tapti við vilja móti FC Midtjylland sunnudagin. Enn veit eingin, nær dómur fellur í málinum.
