Í dag er føðingardagur hjá Atlantsflog, sum fleyg fyrsta túrin úr Vágum til Keypmannahavnar 28. mars í 1988.
Her er eitt søguligt yvirlit:
1987: Tann 4. november leggur Lasse Klein, landsstýrismaður, fyri løgtingið uppskot um at stovna nýtt føroyskt flogfelag
1988: 28. mars flýgur Atlantic Airways sín fyrsta túr millum Vágar og Keypmannahavn.
1990: Atlantic Review kemur út á fyrsta sinni.
1991: Byrjaðu fyrstu ferð at flúgva til Billund.
1992: Cimber Air fer úr felagnum, og landsstýrið setir 75 mió. kr. í nýggjum partapeningi í Atlantic Airways.
1994: Atlantic Airways yvirtekur tyrluflúgvingina millum oyggjarnar frá Strandferðsluni.
1995: Felagið hevur á fyrsta sinni avlop á rakstrinum. Fyrsti stjórin, Heri Mortensen, fer frá, og Magni Arge tekur við. Byrjaðu at flúgva millum Føroyar og Ísland í samstarvi við íslendingar.
1997: Uppaftur meiri ferð kemur á virksemið hjá felagnum, tá ið tað fer at flúgva millum Ísland og Grønland í samstarvi við íslendingar.
1998: Sjøtul verður settur á rutu til Skotlands, og túratalið millum Føroyar og Danmark verður økt, og eitt flogfar verður leigað inn til flúgving í háárstíð.
1999: Felagið fer undir at flúgva til Noregs, og sáttmáli verður undirskrivaður um at keypa nýtt flogfar, sum skal latast felagnum í februar í 2000.
2000: Atlantic Airways fær annað flogfarið í flotan 2. februar. Flogfarið er av slagnum British Aerospace, sum er sama slag flogfar sum fyrsta flogfarið hjá felagnum.
2001: Bjargingartyrlan Bell 412 kemur til Føroya sjálvan flaggdagin, og Atlantic Airways skal standa fyri leiting og bjarging kring Føroyar tey næstu 10 árini sambært sáttmála við Fiskimálaráðið.
2002: Ferðafólkatalið hjá felagnum fer á fyrsta sinni upp um 100.000. Hetta er stór øking samanborið við 1995, tá ið talið var um 50.000.
2004: Atlantic Airways stovnar Súluskipanina, har tey ferðandi kunnu savna sær stempul til at keypa Súluferðir fyri. Leiguflúgving í Noregi byrjar av álvara. Triðja flogfarið verður keypt.
2005: Felagið keypir fyrsta Avro RJ-flogfarið frá Swiss. Flogfarið tekur fleiri ferðafólk og røkkur longri enn British Aerospace- flogførini. Atlantic Airways vinnur heiðurin Ársins Átak á Vinnudegnum.
2006: Atlantic Airways fær kapping frá nýggja føroyska flogfelagnum, FaroeJet, sum flýgur í eitt gott hálvt ár millum Føroyar og Danmark. 10. oktober fer eitt flogfar hjá Atlantic Airways út av flogvøllinum í Stord í Noregi. Fýra fólk láta lív, teirra millum flogternan Guðrun Hervør Joensen úr Bø, 41 ár.
2007: Felagið keypir tvey Avro RJ-flogfør aftrat frá Swiss. Flotin telur sjey flogfør. Ein triðingur av Atlantic Airways verður einskildur, og felagið verður skrásett á partabræva- marknaðinum í Íslandi, ICEX.
2008: Atlantic Airways ger 30. januar sáttmála við Airbus um at byggja eitt nýtt flogfar av slagnum Airbus 319. Um várið kemur nýggj Augusta Westland 139-tyrla í flotan.
2009: Felagið hevur á fyrsta sinni hall síðan 1994. Fíggjarkreppa, minkandi virksemi og kreppa í altjóða flogvinnuni eru orsøkin til hallið. Felagið setti umfatandi tiltøk í verk at tillaga virksemið.
2010: Atlantic Airways hevur aftur avlop á rakstrinum. Avlopið
er 12,3 mió. kr. eftir skatt samanborið við 6,6 mió. kr. í halli árið fyri, hóast øskuskýggj úr Eyjafjallajøkli í Íslandi leggur flogferðsluna lamna í fleiri vikur.
2011: Sáttmáli verður gjørdur um at selja Augusta Westland 139-tyrluna. Longda flogbreytin í Vágum verður tikin í nýtslu í desember, og felagið røkkur einum av bestu úrslitunum nakrantíð.
2012: Fyrsta Airbus A319 flogfarið kemur heim úr Hamburg, og Atlantic Airways fer undir at flúgva beinleiðis til Barcelona. Felagið fær bronsumerki sum ársins evropiska flogfelag frá European Regions Airline Association.
2013: Felagið kann hátíðarhalda 25 ára føðingardag. Eginognin hjá felagnum er 247 mió. kr., og føroyingar kunnu nú eisini flúgva beinleiðis til Milano aftrat Barcelona. Felagið leigar tvey Airbus A319 flogfør. Magni Arge fer frá sum stjóri, og Jørgen Holme verður fyribilsstjóri í felagnum.
2014: Løgtingið samtykkir, at keypa triðingin av Atlantic Airways, sum varð einskildur í 2007, aftur. Ferðafólk nr. 3.000.000 við Atlantic Airways fer á flog seinast í november.
2015: Atlantic Airways skiftir tyrluflotan út og keypir tvær nýggjar AW139 tyrlur í staðin fyri tær 20 ára gomlu Bell 412 tyrlurnar. Í juni verður skrivað undir avtalu við Airbus um ein nýggjan Airbus A320. Jóhanna á Bergi verður sett sum stjóri í Atlantic Airways.
2016: Súluskipanin fer í søguna, og ferðafólkatølini eru methøg.
Í desember kemur nýggja Airbus 320 flogfarið til Føroya, og flotin verður navngivin eftir kendum føroyskum listafólkum, William (Heinesen), Ingálvur (av Reyni), Elinborg (Lützen), Sámal (Mikines-Joensen) og Ruth (Smith).
2017: Atlantic Airways verður blakað úr Eurobonusskipanini og stovnar nýggju trúfestisskipanina, Súlubonus. Eisini fer felagið undir ungdómsferðaseðilin, Sveiggj.
2018: Atlantic Airways fyllir 30 ár. Felagið undirskrivar leiguavtalu um nýggjan Airbus 320neo.
2019: Atlantic Airways skrivar undir sáttmála um seinna Airbus 320neo flogfarið, felagið fer undir at flúgva til franska høvuðsstaðin París, og felagið setir met við ferðafólkatalið, tá 336.000 fólk flúgva við føroyska flogfelagnum.
2020 og 2021: Korona rakar, og leggur flogferðslu lamna kring allan heimin.
