Tað gekk væl at fiska hjá Kambi, tá teir byrjaðu fiskiskap á Flemish Kap á fyrsta túri í ár. Teir fyrstu dagarnar var nógvur fiskur at fáa og Mortan Mortensen, skipari, segði, at tað stóð á at frysta.
Kambur var fleiri túrar á Flemish Kap í fjør, men tá var talan um ísfisk - og ikki frystan fisk. Nú er frystiútgerðin tikin í nýtslu, og tað merkir, at fiskurin, sum verður frystur, fyrst verður kruvdur og avhøvdaður.
Tá Sosialurin hitti skiparan á Kambi fríggjadagin, læt hann ikki væl at fiskiskapinum. Hini línuskipini, sum í løtuni eru á Flemish Kap saman við Kambi, eru Klakkur og Váðasteinur.
Klakkur frystir og Váðasteinur, sum nú er á øðrum túrinum higartil í ár, ísar fiskin.
Vánalig veðurlíkindi
Henda dagin, vit skiftu orð við Mortan Mortensen, var illveður og kalt á leiðini, og skipini høvdu roynt ymsastaðni.
- Vit hava umleið 140-150 tons av avhøvdaðum og frystum fiski. Kambur tekur umleið 200 tons av frystum, so vit fara at royna í nakrar dagar aftrat. Eg vóni, at versnaði línufiskiskapurin hevur nakað við gýtingina at gera, og vit vóna allir, at fiskur verður aftur at fáa, áðrenn langt um líðir.
Skiparin á Kambi tóktist eisini eitt sindur órógvaður av, at føroysku djúpvatnstrolararnir, sum eru á Flemish Kap, helst fara at stinga av við tí mesta av felagskvotuni í ár.
Orð nytta einki
Kvotan er nú hálvfiskað, og tað er einki skott í kvotuni. Fiskað verður, til kvotan er uppi.
Landsstýrismaðurin í fiskivinnumálum, Jacob Vestergaard, hevur sagt, at kanska skuldi skott verið í kvotuni, soleiðis at ein partur er til línu - og ein partur til trol.
- Men, tað nyttar einki bara at snakka. Uttan handlingar, er ein slík útsøgn einki verd, sigur Mortan Mortensen, skipari.
Við seinastu uppgerð hjá Fiskiveiðieftirlitinum høvdu trolararnir fiskað stívliga 1100 tons - og línuskipini høvdu tá fiskað góð 400 tons.
