Netið hevur gjørt, at almenningurin sær meira, enn møguligt hevur verið áður.
Fólk eru røsk at leggja myndir út á facebook, og nú fjøllini verða gingin, og nógv verður flett kring um landið, eru nógvar flottar myndir at síggja.
Myndin, sum er viðheft hesum greinastubba, liggur á facebook-síðuni hjá løgtingsmanninum á Sandi, Pálli á Reynatúgvu.
Páll sigur, at í ár er fyrstu ferð hent, at eitt gimburlamb í Innara Haga er farið um tey 40 pundini, og aðrastaðni sigur løgtingsmaðurin, at vektin í ár er góð.
Ein viðmerkjari skrivar, at hetta er "góður ásur" - og kanska fer onkur at ivast í, hvat ásur í veruleikanum er.
Ásur er bjálki ella mønutræ í hjalli - træ, sum krov verða hongd á at turka. Kjøtásur verður eisini brúkt um træið, har krovini hanga á spritu tvørtur um ásin.
Í øllum førum kann staðfestast, at hjallurin hjá Pálli á Reynatúgvu, har hesi vøkru krovini hanga, er sera nossligur.
