6?MANNAFØR MENN
Undan leygardegnum vóru tveir áhugaverdir spurningar í sambandi við kappingina millum 6?mannaførini við monnum. Annar var, um vágbingarnir umborð á Smyrli nú høvdu mist tamarhaldið á hesi kappingini, sum teir í eitt ár og fram til kappingina á Fjarðastevnuni høvdu havt tamarhald á. Hin spurningurin var, um klaksvíkingar eftir sigurin á Fjarðastevnuni nú aftur høvdu fingið eina manning, sum tað kundi roknast við fór at kappast um fremsta plássið.
Svarini upp á báðar spurningarnar vóru í Kollafirði nei. Úrslitið vísti, at Smyril avgjørt ikki hevur mist tamarhaldið á hesi kappingini, og úrslitið vísti eisini staðiliga, at klaksvíkingar ikki kunnu roknast millum favorittarnar.
Páll Fangi legði annars væl fyri. Teir tóktust ætla sær sama taktikkin, sum teir høvdu so góða eydnu við á Skálafjørðinum. Ta ferðina var Páll Fangi fremstur so at siga allan vegin. Hesa ferð var hann fremstur fyrstu fimm hundrað metrarnar. So legði Jarnbardur seg upp á síðuna av honum, og tá ið málið var hálva rógvið, legði Smyril framat. Vágbingar løgdu seg á odda, og teir vóru sannførandi. Teir fóru fyrstir undir endaspurtin, og tá stóð eingin teimum kurl.
Fyri teir umborð á Páll Fanga kendist tað sum vónbrot, at tað umframt Smyril eisini eydnaðist bæði Jarnbardi og Stráluni at vinna á teimum. Hetta var ikki tað, sum teir høvdu vónað, tá ið teir leygarmorgunin fóru úr Klaksvík og vestur til Kollafirðar.
? Vit kundu takka okkum sjálvum fyri, at tað ikki royndist so væl á Skálafjørðinum. Vit vóru stutt sagt ikki nóg væl uppsettir. Undan Sundalagsstevnuni høvdu vit arbeitt nógv við at seta okkum upp til kappingina. Vit vóru væl fyri, og vit eru fegnir um, at tað aftur eydnaðist at vinna, siga teir umborð á Smyrli.
Leygardagin fer Smyril á Jóansøku at verja kappróðraræruna hjá suðuroyingum. Um tað verða klaksvíkingar, strandingar ella teir umborð á Jarnbardi úr høvuðsstaðnum, sum fara at bjóða av, er meiri ivasamt, men avrikið og úrslitið í Kollafirði bar lítlar ábendingar við sær um, at tað skal eydnast hjá nøkrum at gera av við teir umborð á Smyrli ? um tað aftur fer at eydnast hjá teimum at vinna yvir sær sjálvum.
