Seinasta samdøgur eru skrásettir 1351 smittutilburðir við koronu í Danmark.
Tað vísa nýggjastu tølini hjá Statens Serum Institut.
Hetta er samstundis næst størsta smittutal yvir eitt samdøgur síðan í byrjanini av januar, tá smittutølini vóru høg.
Hin 13. mai vórðu staðfestir 1355 smittutilburðir í Danmark, og soleiðis eru tølini seinasta samdøgur millum tey hægstu seinastu nógvu vikurnar.
Talið av innleggingum minkaði seinasta samdøgur við 17 niður í 143, og eingin doyði við koronu.
Tey, sum vórðu staðfest smittað í Danmark seinasta samdøgur, vórðu funnin í 211.369 royndum, og talið av koronu-royndum er nógv økt seinastu mánaðirnar.
Smittutølini í Danmark hava seinastu tíðina verið veksandi.
Ritzau veit at siga, at í byrjanini av hesi vikuni lógu smittutølini niðan fyri 1000 um samdøgnið.
Men, bæði mikudagin, hósdagin og í dag, fríggjadagin, eru fleiri enn 1000 fólk staðfest smittað um døgnið.
