Um seks tíðina í gjárkvøldið fekk løgreglan eina fráboðan um, at eldur var í einari bingju í grótbrotinum í Sandavági.
Sløkkiliðið var skjótt á staðnum, fekk tamarhald á støðuni og sløkti eldin í bingjuni, ið var full av timbri og pappi. Bingjan stóð í einum grótbroti, so tað var avmarka hvussu nógvan skaða eldurin kundi gera.
Vakthavandi á løgreglustøðini upplýsir, at tað vóru smádreingir, ið høvdu spælt við eld og mistu tamarhald á honum, ið vóru atvoldin til eldsbrunan.
Dreingirnir eru undir revsialdur, ið er fimtan ár, og kunnu harvið ikki revsast fyri tilburðin, men løgreglan hevur havt ein fund við foreldrini og barnaverndina um tilburðin í grótbrotinum í gjár.
