Tórshavnar kommuna fer ikki at órógva tey, sum vilja njóta sólarmyrkingina 20. mars við, at gøtuljósini tendra og »køva« myrkrið.
– Vit hava havt eitt ávíst samskifti við Kunningarstovuna viðvíkjandi sólarmyrkingini, og gøtuljósini verða sløkt undir sólarmyrkingini, sigur Viggo Christiansen, leiðari á gøtuljósdeildini hjá Tórshavnar kommunu.
– Helst verða gøtuljósini sløkt kvøldið fyri – fyri at tryggja okkum, at einki kiksar, sigur Viggo Christiansen.
Tað verður klokkan 9:40:12 fríggjadagin 20. mars at ein full sólarmyrking rakar Mykineshólm og fer síðan um allar oyggjarnar. Um leið hálvan annan minutt seinni kemur myrkrið til eystasta punktið á Fugloynni og fer so víðari norðureftir. Í Føroyum verður longst myrkt í Mykineshólmi, har tað verður myrkt í 2 minuttir og 24 sekund.
Ein sólarmyrking er, tá ið mánin stendur millum sólina og jørðina, soleiðis at jørðin kemur í skuggan av mánanum. Tá ið sólarmyrkingin er full, verður myrkt eina løtu, og so verður ljóst aftur.
Fullar sólarmyrkingar eru ógvuliga sjáldsamar, og seinasta fulla sólarmyrkingin í Føroyum var 30. juni í 1954.
