Ungu eysturoyingarnir í Sleepless Ghosts megnaðu við sínum sveimandi post-rokki, at skúgva øll hini til viks og vinna Sement 2012
Leygarkvøldið var finalan í tónleikakappingini Sement. Heili 25 bólkar hava luttikið í kappingi í ár, har av sjey endaðu í finaluni: Ari, Bogi og Barbara, The Happening, Black Crow King, Tummas Larsen, Sleepless Ghosts, Jústines í Túni
Og tá ið avtornaði vóru tað Sleepless Ghosts, ið fóru við sigrinum. Nummar tvey gjørdist Black Crow King, meðan Jústines í Túni endaði á einum triðjaplássi.
Umframt at vinna Sement, ið inniber eitt gávubræv frá Studio Bloch á 10.000 kr., fekk bólkurin eisini eina innbjóðing at spæla á G! Festivalinum 2012.
Undirtøkan bæði frá luttakandi bólkum og áhoyrarum hevur ongantíð verið so stór, og tí boðar Margarinfabrikkin frá, at Sement verður aftur um sama mundi í næsta ár.
Hesum boða fyrireikarar frá í dag.
