Tað er ikki nøktandi, at nakrir føroyingar verða noyddir at rinda dupult gjald til sína egnu pensjón
Nú skulu føroyingar, sum arbeiða uttanlands – fyri ein útlendskan arbeiðsgevara, sleppa undan at rinda til sína egnu eftirløn í Føroyum.
Tað ætlar Jørgen Niclasen, landsstýrismaður í fíggjarmálum, og tað fer hann at leggja uppskot fyri Løgtingið um í næstum.
Hann sigur, at verður uppskotið samtykt í vár, verður broytingin sett í gildi beinanvegin, soleiðis, at tær eisini vera galdandi fyri inntøkurnar í ár.
Hetta upplýsir landsstýrismaðurin, nú Johan Dahl, løgtingsmaður fyri Sambandsflokkin, hevur spurt hann nær ein loysn kann væntast á hesum máli
– Støðan í løtuni er tann, at føroyingar, sum búgva í Føroyum, men sum sigla í Noregi, mugu gjalda eftirløn til tvær eftirlønarskipanir, eina í Føroyum og eina í Noregi.
Aðrir føroyingar, sum búgva í Føroyum, men sum sigla uttanlands, kunnu søkja um at sleppa frá at rinda til føroysku eftirlønarskipanina.
Hinvegin skulu teir, ið sigla við norskum skipum, ella arbeiða í Noregi, rinda til norsku eftirlønarskipanina, Folketrygd, og sostatt fáa teir eisini rætt til eftirløn haðani.
Men tað merkir samstundis, at teir mugu gjalda til eftirløn í tveimum londum og mugu sostatt gjalda ein nógv størri part av sínari inntøku til eftirløn enn fólk flest.
