Amalia í Frammistovu, sum er borgarstjóri í Fugloyar kommunu, sigur, at hetta er fyrsta skúlaárið heilt síðan 1888, at eingin næmingur er í skúlanum á Kirkju.
- Yngsti sonur okkara var seinasti skúlanæmingur í oynni. Hann varð liðugur við 9. flokk í summar og er síðan byrjaður í skúla í Klaksvík, har hann býr á Skúlaheiminum.
Í løtuni er einki barn undir skúlaaldur fastbúgvandi í oynni.
Við ársbyrjan í 2014 vóru 38 fólk skrásett at búgva í Fugloyar kommunu.
Amaila í Frammistovu sigur, at í dag búgva eini 28 fólk á Kirkju - og umleið 14 í Hattarvík.
- Á Kirkju, sum altíð hevur verið hin størra bygdin á Fugloynni, eru væl fleiri sethús enn í Hattarvík, leggur borgarstjórin aftrat.
Fara vit nógv ár aftur í tíðina, búðu í 1940-unum stívliga 200 fólk í Fugloy, og í 1950 vóru 195 fólk skrásett at búgva í oynni.
