Sum Sosialurin skilir, so er hetta ætlanin. Men hetta kann sjálvandi broytast, alt eftir hvussu løgtingsfólk klára at standa ímóti trýstinum, sum er í dag. Fríggjadagin var rok í tinginum, tí sannur valfepur var á tingfólki, har minnilutar blokeraðu í bæði borð – meðan nøkur løgdu seg tvør í sambandi við brúksskylduna, so vóru onnur, sum blokeraðu fyri, at Húsalánsgrunnurin varð viðgjørdur í Fíggjarnevndini.
Í dag – eftir at blaðið er farið til prentingar – er málið um lutaíbúðir á skránni, og óvist er, hvørja lagnu tað málið fær.
Men klára tingfólk ikki hetta trýstið, so kann henda, at valið longu verður skrivað út í dag. Men vit trúgva mest uppá, at løgmaður bíðar til ætlaða tíðindafundin í morgin klokkan 10 at skriva út valið, sum so skal haldast í fyrsta lagið um fimm vikur, tað er týsdagin 25. oktober og í seinasta lagið um seks vikur, týsdagin 2. november. Men sannlíkt verður valið 25. oktober. Men velur løgmaður eitt leygardagsval, so verður tað 29. oktober.
