Royal Bank of Scotland liggur nú inni við 20 milliardum pundum umleið 175 milliardum krónum sum bankin kundi hugsað sær at lánt út, men sum tað ikki ber til at finna kundar til.
- Vit lána so nógv út, sum vit fáa, men smærri og miðalstórar fyritøkur vilja ikki taka lán, sigur Stephen Hester, stjóri í Royal Bank of Scotland, við blaðið The Telegraph.
Hann vísur á, at vinnulívið hevur ikki so góðar vónir til framtíðina, og tað hevur steðgað vøkstrinum í bæði vinnulívi og hjá bankunum. Eisini eru treytirnar at lána pengar strangari, enn tær hava verið.
Bretski staturin eigur 82 prosent av Royal Bank of Scotland, eftir at bankin í 2008 varð bjargaður av tí almenna. Úrslitið hjá bankanum fyri fyrstu ársfjórðingin í ár var eitt avlop á góðar 7 milliardir krónur fyri skatt, og tað var stór framgongd samanborið við somu tíð í fjør.
