Forsetin í Ukraina, Volodymyr Zelenskyj, sigur, at russiskar rakettir í kvøld raktu Kyiv beint eftir fundin við ST-aðalskrivaran, António Guterres.
Í minsta lagi 10 fólk hava fingið løstir í álopinum.
Borgarstjórin í Kyiv, Vladimir Klitsjko, skrivar á Telegram, at tvey rakettálop eru framd á høvuðsstaðin í Sjevtsjenkivskyj-økinum miðskeiðis í Kyiv.
- Niðaru hæddirnar í einum bústaðarbygningi eru raktar, og bjargingarfólk og heilsustarvsfólk arbeiða á staðnum. Fólk verða eisini flutt úr nærmastu húsunum, skrivar Vladimir Klitsjko.
Ukrainsk bjargingarlið skriva á Telegram, at ein íbúðarbygningur er raktur í álopinum, og at tvær tær niðastu hæddirnar í bygninginum eru oyðilagdar.
Útlendskir miðlar vita at siga, at tríggjar russiskar rakettir eisini hava rakt býin, Fastiv, sum liggur í ein útsynning úr Kyiv, og álop hava eisini verið á aðrar býir í Ukraina í kvøld.
Álopið á Kyiv fór fram júst í kvøld, nú ST-aðalskrivarin, António Guterres, er í høvuðsstaðnum og hevur fund við ukrainska forsetan, Volodymyr Zelenskyj.
##med2##
Ein talsmaður fyri neyðhjálparskrivstovuna hjá ST, Saviano Abreu, sum fylgir António Guterres á ferðini, sigur, at tey eru í tryggleika.
- Hetta er eitt krígsherjað land, men vit eru skelkað, nú álopið varð framt so nær, og meðan vit eru her, sigur talsmaðurin hjá ST.
Ukrainski forsetin, Volodymyr Zelenskyj, sigur í einari røðu, sum forsetaskrivstovan hevur lagt út á Telegram, at tilsamans fimm rakettir hava rakt Kyiv-regiónina í kvøld.
- Russisku álopini á Mariupol steðgaðu ikki, sjálvt tá ST-aðalskrivarin vitjaði í Moskva. Og í kvøld, beint eftir okkara samrøður, flugu russiskar rakettir inn í høvuðsstaðin, sigur hann.
Volodymyr Zelenskyj heldur fyri, at hesar hendingar vísa sanna hugburðin hjá Russlandi til altjóða stovnar, har landið í hesum føri vil eyðmýkja ST.
