Ærumorðið á ta 26 ára gomlu kurdisku kvinnuna Fadimu Sahindal í januar skelkaði alt Svøríki.
Mikudagin var mamma hennara til avhoyringar hjá svensku løgregluni. Hon greiddi frá, at hon, Fadima og tvær yngri døtur vóru komnar saman um kvøldið tann 21. januar, tá onkur brádliga bankaði á dyrnar. Systir Fadimu, sum átti íbúðina, fór uttar at vita, hvør tað var. Ígjøgnum eitt hol í hurðini sá hon, at tað var pápi hennara. Tær fýra vóru greiðar yvir, at hann ætlaði sær at revsa Fadimu, tí hon hevði havt ein svenskan drong, og tær avgjørdu tí ikki at lata dyrnar upp. Ístaðin sløktu tær ljósið inni og sjónvarpið. Tá tær einki hoyrdu aftur í ein hálvan tíma, hildu tær, at pápin mundi vera farin, men tá Fadima um hálvgum tíggju-tíðina ætlaði sær til hús, stóð pápin í hurðini fyri henni við skammbyrsu í hondini.
Undir avhoyringini mikudagin greiddi mamman frá, at tað eydnaðist sær at fáa í armin á manninum.
- Skjót meg! Skjót heldur meg, rópti eg.
Men Rahmi Sahindal lurtaði ikki eftir henni. Ístaðin setti hann skammbyrsuna ímóti høkuni á Fadimu og skjeyt. Eftir at hon var dottin niður á gólvið í gongini, skjeyt hann hana tvær ferðir afturat í høvdið.
Mikudagin avgjørdi svenska ákæruvaldið at ákæra Rahim Sahindal fyri morð.
