Á skránni verður løgtingslóg um útbjóðing v.m. og ABF 92. Skeiðið er ætlað handverksmeistarum, teknikarum, byggifrøðingum, verkfrøðingum, arkitektum, løgfrøðingum og banka- og sparikassafólki. Skeiðið verður skipað saman við Byggeriets Arbejdsgivere.
AB 92 er eitt avtaludokument, sum partarnir innan byggivinnuna eru komnir ásamt um, tvs. byggiharrar, ráðgevarir og entreprenørar. Við tað at AB 92 er gjørt fyri tað danska byggi- og anlegsvirksemið, hava føroyingar gjørt eitt ABF 92, har tey vanligastu frávikini eru savnaði, sum eru grundað á serstøk føroysk viðurskiftir.
Ein trímannanevnd varð sett at arbeiða við málinum og í hesi nevnd vóru fyri arbeiðsánarar: Gunnleyg Durhuus, arkitektur, fyri ráðgevararnar: Jørgen Jacobsen, verkfrøðingur, og fyri arbeiðstakararnar: Kristian Rasmussen, verkfrøðingur.
Ávegis hava hesir stovnar og feløg fingið uppskot sendandi til ummælis: Advokatfelag Føroya, Arkitektafelag Føroya, Fíggjarmálastýrið, Føroya Byggifrøðingafelag, Føroya Handverksmeistarafelag, Føroya Kommunufelag, Føroya Teknikarafelag (Starvsmannafelagið), Føroya Verkfrøðingafelag, Almanna- og heilsumálastýrið, Klaksvíkar Kommuna, Landsverkfrøðingurin, Løgmansskrivstovan, Undirvísingar- og mentamálastýrið, Runavíkar Kommuna, SEV, Sorinskrivarin, Føroya Tele, Tórshavnar Kommuna, Tryggingarfelagið Føroyar, Fiskimálastýrið og Vinnumálastýrið.
Við hesum arbeiði er fingið til vega eitt avtalugrundarlag fyri byggi- og anlegsarbeiðið í Føroyum.
ABF 92 ásetir reglar fyri fremjanini av byggimannagongdini, og snýr seg um skyldir og rættindi hjá pørtunum í eini enterprisuavtalu, í hesum førum hjá byggiharranum og entreprenørinum. Reglarnir snúgva seg um, hvussu partarnir samvirka, støðan hjá pørtunum, tá ið broytingar eru í arbeiðnum og við óvæntaði viðurskiftir, váðabýtið, ábyrgd fyri manglar og seinkan, leingjan av tíðarfreistum, handan av arbeiðnum, trygdarveitingar, gjald og viðgerð av ósemjun, skrivar Vinnuhúsið í tíðindaskrivi.
