John Johannessen
Vinnumálastýrið arbeiðir í løtuni av øllum alvi fyri at finna eina loysn á peningaliga trupulleikanum hjá Postverki Føroya. Og sum skilst, verður loysnin ikki, at stovnurin verður gjørdur um til partafelag, eins og landsstýrismaðurin í vinnumálum hevði ætlað.
Fyri lítlari viku síðani kom alment fram, at kassin hjá Postverkinum er púra tómur, og at virksemið hjá stovninum steðgar innan tríggjar mánaðir, fær Postverkið ikki hjálp frá almenna mundugleikanum.
Lansstýrismaðurin í vinnumálum, Finnbogi Arge, gjørdi tá greitt, at hann ikki ætlar sær at biðja tingið um eykajáttan, fyrr enn hann er vísur í, at bygnaðurin fyri stovnin verður broyttur, so Postverkið gerst alment partafelag.
Nú letur kortini til, at landsstýrismaðurin hevur slept hesi støðu, eftir at partur av samgonguni, nevniliga Tjóðveldisflokkurin, hevur gjørt púra greitt, at hann als ikki kann taka undir við, at Postverkið verður privatiserað.
Drúgv politisk viðgerð
Í oktober í fjør kunnaði postverksstjórin, Bergur í Garði, landsstýrismannin í vinnumálum um, at tað stóð illa til hjá Postverkinum, og at støðan fór at gerast hættislig í vár.
Síðani tá hevur Postverkið fleiri ferðir verið viðgjørt í landsstýrinum. Men eingin loysn er funnin, tí landsstýrið hevur verið rúkandi ósamt um, hvussu trupulleikin hjá Postverkinum skal loysast.
Veruliga bumban brast, tá postverksstjórin fyri einari viku síðani boðaði Finnboga Arge, landsstýrismanni, frá, at úrslitið fyri tríggjar teir fyrstu mánaðirnar í ár var so vánaligt, at kassin hjá Postverkinum er púra tómur í august.
Hetta gjørdi, at ferð kom á politisku viðgerðina, og á landsstýrisfundinum mánadagin varð gjørt av, at Vinnumálastýrið skal gera eitt upplegg til eina loysn. Hetta uppleggið skal leggjast fyri landsstýrið í næstum.
Fer at líkjast Post-Danmark
Tað letur til, at Finnbogi Arge hevur tikið Tjóðveldisflokkin, ið als ikki góðtekur, at Postverkið verður privatiserað, til eftirtektar. Nógv bendir á, at uppleggið, Vinnumálstýrið í løtuni arbeiðir við, gongur út uppá at broyta bygnaðin fyri Postverkið soleiðis, at tað kemur at líkjast bygnaðinum hjá Post Danmark. Hetta er ein millumloysn, ið Tjóðveldisflokkurin hevur mælt til.
Postverksstjórin hevur áður víst á, at vit mugu fáa eina skipan, ið inniber, at Postverkið í størri mun kann arbeiða sum eitt sjálvstøðugt felag. Hann vísir í hesum sambandi á, at Postverk Føroya er einasta felag í Norðurlondum, ið ikki arbeiðir sum eitt sjálvstøðugt felag, men harafturímóti er heft at politiska myndugleikanum.
Um tað fer at eydnast at finna ein loysn á trupulleikanum hjá Postverkinum áðrenn tað verður noytt at steingja, veit Finnbogi Arge ikki at siga. Men hann vísir á, at arbeitt verður av øllum alvi fyri at finna eina loysn sum skjótast.
