Skúli
Á ferðini var hon við til hátíðarhaldið í Hovi í sambandi við, at nýggi skúladepilin varð reistur, og her helt landsstýriskvinnan eisini eina røðu.
Hon segði, at dagurin er ein merkisdagur fyri allar suðuroyingar og fyri allar føroyingar.
- Dagurin merkir, at nýggi skúladepilin, sum fer at gera karmarnar um ungdóm og útbúgvingar í Suðuroy munandi betri, skjótt gerst veruleiki.
Kristina segði, at fyri føroyingar sum heild ber dagurin eisini boð um, at politikarar nú av álvara eru farnir at gera íløgur í tað, sum er so avgerandi fyri framtíðina hjá Suðuroynni og hjá øllum Føroyum – íløgur í ungdóm og vitan.
- Nýggi skúladepilin er fyrsti nýbygningur innan miðnámsskúlar í Føroyum í nógv ár.
Landsstýriskvinnan segði seg fegnast um, at miðnámsskúlaøkið umsíðir hevur fingið alneyðugu raðfestingina.
Gongst sum ætlað, verða verkætlaninar við skúladeplinum í Suðuroy og fiskivinnuskúlanum í Vestmanna – umframt útbyggingin av Tekniska Skúla í Klaksvík – allar lidnar í 2008.
Fyri framman stendur síðan útbyggingin av miðnámsskúlunum í miðstaðarøkinum.
- Hetta eru alt sera tiltrongdar íløgur, segði landsstýriskvinnan.
Hon segði seg onga løtu ivast í, at skúladepilin í Hovi av sonnum verður eitt valaverk og ein avbera spennandi bygging.
- Skúladepilin fer at standa sum ein varði í Suðuroy - nú og framyvir, segði Kristina Háfoss, landsstýriskvinna í mentamálum.
Á portalinum liggur myndafrásøgn frá hátíðarhaldinum í Hovi, tá skúladepilin í Hovi varð reistur.
