Hósdagin vann B36 2-0 í fjórðingsfinaluni í steypakappingini ímóti Skála. Tað var á ovara vølli í Gundadali.
Seint seinnapartin hittast somu feløg á sama vølli. Hagtølini siga, at enn er tað ongantíð eydnast Skála at koppa B36 í høvuðsstaðnum, men tað hevur fleiri ferðir verið tætt við.
Trettan ferðir hava hesi bæði liðini dystast í landskappingini í Gundadali, síðani Skála fyrstu ferð bjóðaði av í fremstu røð í 2002.
Tølini siga, at B36 hevur vunnið seks ferðir, og at tað sjey ferðir er endað javnt. Málmunurin er 25-10 til fyrimunar fyri B36.
Hósdagin vann B36 2-0. Skála gjørdi sjálvmál beinanvegin, og Lukasz Cieslewicz varð skrásettur sum málskjútti, tá ið heimaliðið longu í 21. minutti økti til 2-0. Miðverjin Ahmed Mujdragic varð skrásettur fyri at gera sjálvmál. Upptøkurnar vísa, at tað var eisini serbiski miðverjin, sum við høvdinum stýrdi bóltin í málið, tá ið B36 økti um leiðsluna.
Bólturin hevði ikki kós ímóti málinum fyrrenn eftir at Mujdragic hevði snittað hann.
Setningurin hjá fyrrverandi B36 venjaranum Eyðuni Klakstein og hansara monnum á Skála er í dag at binda betri fyri í verjupartinum. Um tað eydnast at varðveita málleysan javnleik, inntil fyrsta ógvusliga B36 trýstið er hæsað av, styrknað fyritreytirnar nógv fyri at røkka javnleikinum, sum Skála sjey ferðir áður hevur megnað í Gundadali ímóti B36.
Einki er at ivast í, at tað verður stór avbjóðing hjá Skála. B36 hevur vunnið sjey tær seinastu ferðirnar – fimm ferðir í landskappingini og tvær ferðir í steypakappingini – við samantalda málmuninum 16-3. Sjálvsáliðið er stórt í árstalsfelagnum, og tað er stór kapping um plássini á liðnum.
Bæði Jákup á Borg og Eyðun Klakstein broyttu liðið í trimum ódnum frá síðsta sunnudegi og til hósdagin, og tað er rættiliga sannlíkt, at talan aftur í dag fer at vera um broytingar.
