Fótbóltur
Undir vanligum umstøðum er einki at ivast í, at vágbingar vóru stórfavorittar, tá Skála kom á vitjan sunnudagin. Vanliga eru vágbingar sera stinnir á heimavølli, og tá Skála enn ikki hevur vunnið dyst í bestu deildini, átti eingin ivi at verið um útfallið av dystinum.
Men talan hevur ikki verið um nakað vanligt fótbóltsár í Vági. Órógv á venjarasessinum hevur kostað nógv, og í landskappingini hevur leingi staðið greitt, at liðið mest sannlíkt fer at enda onkustaðni í ongamannalandi.
Linligur dystur
Hetta var eisini sjónligt á vøllinum sunnudagin. Skála var komið til Vágs fyri í øllum førum at verja stigið, sum teir høvdu við dystarbyrjan, og tí var dystarupplegg teirra av tí heldur varliga slagnum.
Tí fekk VB rættiliga skjótt leikligu yvirvágina í dystinum, men teimum restaðu tó tað bit, sum teir so ofta hava havt á heimavølli. Leikferðin var í mangar mátar alt ov lág til veruliga at vera nøkur hóttan móti Skála, og tó at nakrir málmøguleikar stungu seg upp, so hevði Eugen Voda í Skála-málinum tamarhald á tí mesta sum kom, tó at hann einstakar ferðir noyddist at vísa síni evni sum málverji.
Beint fyri steðgin var eisini um reppið, at Skála kundi lagt seg á odda, men í evstu løtu fekk VB-verjuleikari vart fyri, tá skotstøða tók seg upp í brotsteiginum.
Í seinna hálvleiki gekst ikki stórt øðrvísi enn í fyrra. Einasta broytingin mundi vera, at nú vágbingar gjørdust alsamt greiðari um, at her fór eingin sigur at koma av sær sjálvum, so gjørdist teir alt meira tráðir í at flyta bóltin fram á Skála hálvuna. Ikki altíð við so øgiliga skilagóðum spæli, men meira við longum bóltum frameftir, sum á ongan hátt gjørdu arbeiðsuppgávuna hjá Skála torførari.
Dramatiska hæddarpunktið í dystinum mundi sostatt vera, tá Tórður Holm stutt fyri leiklok varð rikin av vølli, tá dómarin helt hann brúkt seg dekan ov nógv.
Vónin livir
Samanumtikið var talan soleiðis um ein dyst av meira linliga slagnum, men hetta gjørdi tó ikki frøina á Skálamonnum minni, tá dysturin var lokin.
Eitt skifti hevði bonkurin annars verið vitandi um, at í Havn var TB á odda móti B36, men fyri Skála mundi tað koma væl við, at TB kortini einki fekk við sær. Nú eru bert tvey stig upp til sessin, sum inniber rættin at spæla um sessin í bestu deildini, og enn eigur Skála heimadyst á móti TB.
Dysturin í tølum
VB-Skála0-0
Dómari: Lassin Isaksen
VB: Bjarni Johansen - Slobodan Madzar, Eyðun Jacobsen, Magni Jacobsen ? Mortan í Hørg, Palli Augustinussen, Michael í Lágabø, Marek Wierzbicki, Jón Pauli Olsen ? Dan Djurhuus, Nenad Zivanovic
Skála: Eugen Voda ? Rúni Rasmussen, Bent Djurhuus, Pauli Poulsen, Ronni Hansen Bárður Danielsen? Áki Petersen, Alexandru Gabor, Pauli Hansen, Arnhold Berg ? Alexandur Johansen
