Fótbóltur
Tað gekk av skriðuni hjá Skála í fyrsta partinum av kappingini. Í fýra teimum fyrstu umførunum vunnu teir einki stig, og tað var ikki fyrrenn í 7. umfari, at teir fyri fyrstu ferð vunnu fulla úrtøku. Síðani hevur gingið støðugt rætta vegin, og eftir sigurin á heimavølli ímóti MB, er Skála bara trý stig frá at lyfta seg upp um niðurflytingarstrikuna.
Í toppinum endaði tað við javnleiki á Vágseiði, har B71 vitjaði VB/Sumba. Sandoyingar vóru væl nøgdir við 1. hálvleik, men eftir steðgin høvdu heimamenninir fleiri møguleikar at avgera sær til fyrimunar, uttan at teir tóku av.
TB misti týdningarmikil stig í kappingini um uppflyting, tá ið teir næstbestu hjá HB í Gundadali vunnu 3-2.
Burtursæð frá teimum fýra fremstu – VB/Sumba, B71, TB og HB – eru øll hini í vanda fyri at enda undir niðurflytingar strikuni. Tað resta fimm umfør, og at MB legði rygg til 5-1 tap á Skála ber við sær, at teoretiski møguleikin hjá MB at varðveita sessin í næstbestu deildini er burtur.
Víkingur og NSÍ áttu at hava spælt í Runavík. Av serligum orsøkum var grannauppgerðin útsett. Við góðu gongdini hjá Skála er tað møguleiki fyri, at bæði NSÍ og Víkingur rættuliga kunnu brenna seg í botninum. Tí fer útsetta grannauppgerðin at hava serligan týdning.
23. umfar verður leygardagin. Tá sær skráin soleiðis út: TB-Skála, Víkingur-B71, B68-NSÍ, FC Hoyvík-VB/Sumba og MB-HB.
