Klaksvík:
Henda nýggja lógin sigur, at læknar skulu hava eitt ávíst skeið fyri at kunna útvega sjómonnum eina heilsuváttan.
Hetta førir so við sær, at sjómenn úr Klaksvík noyðast at leita til læknar aðrastaðni í landinum fyri at fáa ta neyðugu heilsuváttanina.
Stutt eftir, at báðir kommunulæknarnir í Klaksvík vóru farnir í summarfrí, fekk ein ungur drongur skipsboð. Hann fór so til kommunlæknan fyri at endurnýggja heilsuváttanina, men hann fekk sum vátan vøtt, tá tað bleiv gjørt honum greitt, at tað kundi ikki lata seg gera í Klaksvík, tí at teir báðir donsku avloysararnir ikki høvdu nakra góðkenning grá Sjóvinnufyrisitingini, sum heimildaði teimum at útvega eina heilsuváttan.
Hesin drongurin skuldi ikki avstað fyrr enn dagin eftir, so hann fór til Gøtu. Og har fekk hann ta neyðugu váttanina. Men um hann nú hevði fingið boð um at skula avstað sama dag, so er tað ikki vist, at tað hevði borið til hjá honum at fingið heilsuváttan. Og so hevði hann helst ikki sloppið avstað.
Onkur helt fyri í hesum, at tað er ófatiligt, at ein fiskivinnubýur, sum Klaksvík ikki skal kunna útvega sínum sjómonnum tey neyðugu skjølini, sum skulu til fyri, at teir kunnu fara til skips.
Danskir læknar góðkennast
Maria á Dul, sum umsitur kommunulæknar í Almanna- og Heilsumálaráðnum sigur við Sosialin, at tað hevur verið arbeitt við at fáa teir donsku avloysararnar, sum koma til landið inn undir ta nýggju lógina, sum krevur, at ein góðkenning frá Sjóvinnufyrisitingini skal til fyri at ein kommunulækni kann útvega ein heilsuváttan. Men hetta er so ikki eydnast enn. Og verður tað tískil heldur ikki í ár, tí nú er summarfrtítíðin við at vera av.
- Men eg ætli mær at arbeiða fram í móti at vit fáa eina loysn á hesum til næsta ár, soleiðis at teir donsku avloysararnir eisini kunnu útvega heilsuváttanir í Føroyum, sigur Maria á Dul.
Hon vísir á, at tað skuldi sum so ikki verið nakar trupulleiki, tí allir teir donsku avloysararnir, sum koma til Føroya í summarfrítíðini eru praktiserandi læknar niðri, og har hava teir so ta neyðugu góðkenningina.
- So skuldi tað ikki verið so torført at fingið teir inn undir ta føroysku góðkenningina, heldur Maria á Dul.
Hon sigur, at hon fer at tosa við Sjóvinnufyrisitingina um, tað er nakar máti at fáa danskar avloysarar undir ta nýggju lógina.
Tríggir kommunulæknar
Tað eru fýra kommunulæknastørv í Klaksvík, men í løtuni eru bert tvey av teimum sett. Tað hevur verið sera trupult at fáa ein kommunulækna í tað triðja starvið, sum nú hevur verið leyst í nøkur ár. Men Maria á Dul sigur, at tað nú er ein góður møguleiki fyri, at tað starvið verður sett í oktobur ella novembur. Og so verða tað aftur tríggir kommunulæknar í Klaksvík.
- Eg kann ikki siga nakað við vissu enn, men í løtuni sær tað positivt út.
- Tað fjórða kommunulæknastarvið verður ikki sett so longi ongi høli eru til taks. Tað er ábyrgdin hjá kommuni at syrgja fyri hølum. Og so longi ongi eru, so verður tað ikki søkt eftir einum fjórða kommunulækna, greiðir Maria frá.
Men sum nú er, so eru tað tveir danskir avloysarar til arbeiðis á kommunulæknaskrivstovunum í Klaksvík. Annar kommunulæknin kemur aftur nú í septembur, meðan hin ikki verður aftur fyrr enn í novembur, og kemur avloysari at verða í hansara stað til ta tíð.
Men ta tíð verður so ein føroyskur kommunulækni við góðkenning frá Sjóvinnufyrisitingini at útvega sjómonnum í Klaksvík heilsuváttan kortini.
