Baklandið hjá Sjálvstýrisflokkinum hevur kravt, at flokkurin fær eitt fólk í landsstýrið. Tað váttaði Jan A. Joensen, landsnevndarformaður í Sjálvstýrisflokkinum fyri útvarpinum fyri løtu síðani. Samráðingarnar ganga sína gongd á gamla Apoteki nú.
Tað hevur ligið í kortunum, at aðalráðini skulu skerast niður. Kanska niður í seks ella sjey. Tað merkir helst, at Sambandsflokkurin og Fólkaflokkurin, sum báðir hava átta tingfólk, skulu hava trý landsstýrisfólk í part. Kanska Miðflokkurin fær eitt, og so er eingin sessur eftir til minsta flokk á tingi, Sjálvstýrisflokkin.
Fyri Sjálvstýrisflokkin hevur tað sum vera man stóran týdning at fáa ein landsstýrissess. Flokkurin veksur 100 prosent í politisku skipanini við at fáa eitt landsstýrisfólk, so tað hevur alstóran týdning fyri flokkin. Hinvegin, so ber til at skipa borgarligu samgonguna uttan um Sjálvstýrisflokkin ella Miðflokkin.
Tað hevur eisini ljóðað, at Kári P. Højgaard verður tingformaður. Men ger hann tað, so telvar hann Sjálvstýrisflokkin uttan fyri alla politiska ávirkan, og tí er tað lítið hugsandi. Mest sannlíkt er, at Sjálvstýrisflokkurin helst fast um kravið um at fáa eitt landsstýrisfólk, tí flokkurin má tryggja, at honum verður lív lagað í framtíðini.
