– Tað einasta eg vil, tað er at finna okkurt, sum kann geva mær ein linna fyri mína sjúku. Tað sigur Gunnvá Tróndardóttir Joensen úr Klaksvík.
Hon hevur sclerosu og hevur roynt tann heilivágin, sum er at fáa fyri sjúkuna. Men heiluvágurin er sterkur og hevur síni hjáárin.
So tá ið hon frætti at úrdráttir úr kannabis kunnu hjálpa sjúklingum við sclerosu, himpraðist hon ikki við at royna tað.
Hon sigur, at hon hevur tosað við læknar um tað, men hon hevur ikki fingið nakað veruligt svar.
– Tað er sum um at læknarnir ikki tora at nerta við tað, tí teir mestsum bara yppa øksl, tá ið eg havi tosað um at fáa heilivág við Kannabis, sigur hon.
So tá ið Gunnvá kom í samband við ein dana, sum gjørdi slíkan heilivág, ivaðist hon ikki í at bíleggja nakað av tí. Og tískil bílegði hon av nakað av sjokolátubønum við kannabis í.
Men kannabis er ikki eitt evni, hon er serfrøðingur í, so hon hugsaði ikki um at í tí hon hevði bílagt, var THC í, sum er tað evnið í Kannabis, sum gevur rús, og sum er ólógligt.
– Tíðin gekk og ongar sjokulátubønir komu fram, sló eg meg til tols við, at tað fór ikki at koma, sigur hon
Tí varð hon eitt sindur kløkk, tá ið telefonin ringdi og boðini í hinum endanum vóru, at at tað var frá narkopolitiðnum.
– Løgreglumaðurin var eitt sindur hvassoraður, tá ið hann spurdi um eg hevði bílagt nakað úr Danmark, og tá ið eg játtaði, spurdi hann hvat eg skuldi gera við tað.
– Men tá ið eg so greiddi frá, at eg hevði sclerosu og eg hetta var ætlað sum heilivágur, varð hann mildari á málinum, men hann gjørdi mær kortini greitt, at eg varð ákærd fyri at hava smugglað tað, sum svarar til 0,1 til 0,9 gramm av hassji til Føroyar.
Og soleiðis hendi tað, at nú skal Gunnvá Tróndardóttir Joensen í rættin, har hon er ákærd fyri at royna at smugla hassj.
Tað verður so fyrstu ferð, at hon sær ein rættarsal innan, og hon harmast um, at sjúklingar við ringum sjúkum koma í støður sum hesar, tí tað er staðfest, at úrdráttir úr kannabis kunnu veita ein linna fyri nógvar ymsar sjúkur.
– Tí heldur hon, at tað er so púra sjálvsagt, at kommunulæknar fáa heimild til at geva sjúklingum heilivág við Kannabis er.
– Sum støðan er nú, eru slíkir sjúklingar tvingaðir til at fáa útvega sær hendan heilivágin á svarta marknaðinum, og tað er rættiliga óheppið. Í fyrra lagi tvingar tað illa sjúk fólk í lógloysi, og harafturat kemur tað, at í roynd og veru er ongin trygd fyri, hvat er í heilivági, sum verður keyptur á svarta marknaðinum.
– Tá hevði tað verið betur fyri allar partar, at tað vóru kommunulæknar, sum fáa heimild at geva henda heilivágin, tí so er tað heilsuverkið, sum umsitur heilivágin. Og tá fæst trygd fyri, at dygdin er, sum hon eigur at vera, sigur Gunnvá Tróndardóttir Joensen.
– Tað einasta sjúklinga vilja, er at fáa linna fyri eini herviligari sjúku, so nú er stundin komin at purra politikararnar út, so at teir bera so í bandi, at vit fáa atgongd til hendan vegin.
Og at hon als ikki er einsamøll við hesum trupulleikanum, fær hon prógv fyri dag og dagliga.
– Eg havi sagt mína hugsan um hetta fyrr og síðani hevur tað verið vanligt, at fólk ringja og skriva til mín at kæra sína neyð, tí tey hava ein næstring, sum hevur tað ringt av eini herviligari sjúkur, ella tey sjálvi eru í neyð, sigur hon.
