Sjálvandi er tað ikki gott, um tað gýsur og fýsur gjøgnum dyrnar í Fíggjarmálaráðnum. Men bara tað at eitt aðalráð - enntá við fíggjarmálaráðharranum á odda - kann finna upp á at biða løgtingið um eina eykajáttan upp á slaka millión til eina nýggja úthurð í hesum døgum, tað sigur, at ómetaliga lítið samband er millum býrokratarnar í Fíggjarmálaráðnum og fólkið á gøtuni.
Góði Jóannes Eidesgaard! Fá onkran at bøta um hurðina, og brúka hasa slaku milliónina til at »tryggja føroyska vælferðarsamfelagið«. Sambært løgmanni skulu tit finna seks milliónir afturat fyri at liva upp til tíni egnu krøv. Droppa tí hasa hurðina – so eru bara 11 milliónir eftir at finna til tess at bjarga føroyska vælferðarsamfelagnum.
