Klokkan verður knapt fýra seinnapartin, tá ið FM steyp og gullkrónur fara at verða handað NSÍ í Klaksvík. Tað fara Óli Holm, FSF formaður, Karl Vidtfeldt, formaður í kappingarnevndini, og Ísak Mikladal, aðalskrivari í FSF, at taka sær av.
Sambært støðutalvuni er B36 á silvurplássinum undan síðsta dystinum, sum er ímóti grannunum í HB. Tað er upp til B36 at syrgja fyri, at árstalsfelagið vinnur silvurkrónurnar.
FSF umboðið í Gundadali verður Høgni í Stórustovu, og hann hevur silvurkrónurnar í viðførinum.
EB/Streymur hevur tryggjað sær í hvussu so er bronsumerkini í landskappingini. Í EB/Streymi eru øll væl nøgd við kappingarárið, tí umframt í hvussu so er bronsu í landskappingini, so hevur felagið vunnið gull í steypakappingini.
Fyrrapartin eru nógv viðhaldsfólk hjá EB/Streymi farin um Skopunarfjørð at taka á við felagsliðnum. Um tað eydnast EB/Streymi at fáa fulla úrtøku ímóti B71, so er møguleiki fyri, at liðið í staðin fyri bronsu fer at vinna silvur í landskappingini. Treytin er, at felagsliðið fær fulla úrtøku, og at B36 ikki fær meiri enn eitt stig burturúr grannauppgerðini.
Niclas Davidsen er vegna Fótbóltssambandið farin suður um Skopunarfjørð. Í viðførinum hevur hann bronsumerkini.
Um støðan eftir 27. umfar verður tann, at EB/Streymur verður frammanfyri B36, so verða heiðursmerkini handað seinni.
