Ein stórur meiriluti av føroyingar vil ikki síggja flóttafólk í Føroyum. Tað er greiða niðurstøðan í eini kanning, spyr.fo, hevur gjørt fyri okkum.
Spurningurin um flóttafólk í Føroyum hevur verið eitt hitt heitasta kjakevnið í Føroyum síðani ársskiftið, tá ið løgmaður helt sína umstríddu nýggjársrøðu fyri føroyingum.
Tá staðfestir hann, at eisini føroyingar eiga at gera sínar altjóða og menniskjansliga skyldu á flóttafólkaøkinum. Hann nevndi í hesum sambandi, at vit eiga at taka ímóti einum 40-50 flóttafólkadamiljum.
Seinni hevur hann drigið íland og viðurkent, at tað var eitt mistak at nevna nakað ávíst tal. Men annars broytir hann ikki støðu, tí hann heldur framvegis, at vit eiga at taka ímóti flóttafólkum.
Hinvegin eru onnur boð komin upp á, hvussu nógvum, flóttafólkum, vit kunnu taka ímóti.
Johan Dahl, sum er landsstýrismaður í útlendingamálum, staðfestir, at sum støðan er nú, eru als ikki til reiðar at taka ímóti flóttafólkum. Tað fyrsta, vit eiga at gera, er at taka støðu til um vit yvirhøvur skulu taka ímóti flóttafólkum í Føroyum.
Koma vit til ta niðurstøðu, at tað skulu vit, skal eitt drúgt fyrireikingararbeiði gerast fyri at vit hava eitt tilboð til tey, tá ið tey koma. Men hann helt, at talan kann í mesta lagið vera um at taka ímóti 5-10 flóttafólkafamiljum, helst kanska bara tveimum ella trimum familjum.
Páll á Reynatúgvu úr Tjóðveldi er eisini varin, tí hansara boð er, at vit taka ímóti 10 familjum hesi næstu 20 árini, ella einari familju annaðhvørt ár.
Men enn hevur ongin spurt vanliga føroyingin, hvat hann heldur um flóttafólk og tískil hava vit fingið spyr.fo at gera eina spurnarkanning fyri okkum
Kanningin byggir á svar frá 530 tilvildarliga valdum føroyingum. Og hon vísir, at greiður meiriluti av føroyingum eru ímóti at fáa flóttafólk til Føroya.
Kanningin vísir nevniliga, at 63 prosent, ella næstan tveir triðingar av føroyingum, vilja ikki at vit skulu taka ímóti flóttafólki í Føroyum.
Hinvegin vísir kanningin eisini, at 37 prosent, ella gott og væl ein triðingur, heldur, at vit eiga at taka ímóti flóttafólki.
Vit hava meiri um kanningina seinni í dag. Eitt nú eru fólk eisini spurd, hví tey ikki vilja taka ímóti flóttafólkum. Og vit fáa eisini at vita um munur er á, hvat mannfólk og konufólk halda um hendan spurning.
|
