Eitt dømi um hetta er í seinastu útgávu av Kvinnu. Í viðtali við blaðið sigur Helena Dam á Neystabø soleiðis um orsøkina til, at hon fór upp í politikk í 1990:
»Tað kom ein øði í meg, tí eg helt, at tað heila fór av skriðuni. Teir stóru flokkarnir sóu ikki, hvat var í ferð við at henda, tað var ein ovurhonds optimisma í landinum, alt bar til. Øll vanlig mennisku sóu, at tað gekk ikki... ... Tá eg so fekk eina áheitan um at stilla upp, hugsaði eg: Hví ikki? Og so varð eg vald.«
Tað er møguligt, at hon hevur rætt í hesi lýsing av støðuni í 1990. Men tað var ikki orsøkin til øðina, sum kom í hana. Helena var aktivur limur í Javnaðarflokkinum heilt til tveir dagar áðrenn hon kom á listan hjá Sjálvstýrisflokkinum. Øðin kom í hana, tá Suðurstreymoyar Javnaðarfelag vrakaði mann hennara, Kristian á Neystabø, sum valevni. Hann var ikki millum tey 16, sum vórðu vald á listan hetta mánakvøldið.
Helena Dam á Neystabø rýmdi av fundinum, og tveir dagar seinni var hon valevni hjá Sjálvstýrisflokkinum.
Tað hevði verið reiðiligari, um hon segði ta røttu og sonnu søguna.
