SIÐSEMISNEVNDIN
Vísinda Siðsemisnevndin hevði hósdagin sín fyrsta fund. Teir sjey limirnir hittust fyri fyrstu ferð síðani nevndin varð skipað av nýggjum. Á fyrsta fundinum skipaði nevndin seg við Høgna Djurhuus sum formanni. Tað er sostatt verandi formaður, ið heldur fram í sessinum.
Siðsemisnevndin hevur rættiliga verið í andglettinum, síðani Bill Justinussen sum nýggjur landsstýrismaður valdi nýggj umboð í nevndina. Nevndarvalið hevur verið á ovasta politiska stigið og vent, tí ivi er sáddur um tey fólk, ið Bill Justinussen hevur valt í nevndini. Eisini á tingi hava atfinningarnar verið nógvar móti teimum, ið Bill Justinussen hevur valt í nevndina.
Tað er Læknafelagið og landsstýrismaðurin í heilsumálum, ið velja limirnar í nevndina.
Teir tríggir nevndarlimirnir, sum Lækanfelagið valdi í nevndina, eru Høgni Djurhuus, Annika Olsen og Eliesar Olsen, sum øll eru læknar.
Hinir fýra nevndarlimirnir eru:
Anne-Lene Olofson, lektari úr Klaksvík, Eydna Háberg, sjúkrasystir úr Havn, Dánjal á Dul Jacobsen, fyristøðumaður úr Havn og Jens Vang, løgfrøðingur úr Havn.
