– Eg vildi heilt vist gjarna havt vunnið bæði skjótari og greiðari. Og skuldi eg enntá serva síðstu bóltarnar. Har stóð og eg skinklaði og ivaðist í, um eg fór at fáa bóltarnar yvirum, men tað gjørdi eg tíbetur, segði Jan Ó. Ellingsgaard, ið servaði ÍF frá 10-12 upp á 14-12 í fimta setti, tá alt annars sá svart út, tí Mjølnir var á veg ímóti sigrinum.
– Vit vóru skakaðir av klaksvíkingum, men komu sterkt aftur. At tað skuldu gerast fimm sett, var ikki so óvæntað, tí vit høvdu júst spælt ein fimmsettara ímóti teimum.
Júst FM-finalurnar er næsta avbjóðingin hjá ÍF, ið longu hevur sett seg á annan finalusessin:
– Vit ætla at vinna alt, so steypasigurin í dag er bara fyrsta stigið á leiðini. Vit eru væl fyri og okkum dámar eisini væl sovorðnar dystir sum hendan, við fimm hørðum settum, sigur Jan.
– Og nú eru vit so vanir við tað, at skuldu tað blivið einar tvær ella tríggjar FM-finalur í fimm settum, klára vit eisini tað.
