Á Fiskamarknaði Føroya vænta tey, at fleiri línuskip koma inn at landa í næstu viku. Skipini hava eina blanding av toski, longu, brosmu og hýsu.
- Línuskipini royna bæði á Íslandsrygginum, á djúpum vatni og inni á landgrunninum. Okkurt línuskip er nýliga byrjað túr og kemur tí neyvan inn at landa í vikuni sum kemur.
Føroysku frystilínuskipini, sum fiska á Flemish Kap, hava verið inni og landað. Fiskurin verður í bingjum sendur heim til Føroya. Fiskiskapurin á Flemish Kap hevur higartil verið sera góður.
Um útlitini til útróður í næstu viku, vita tey á Fiskamarknaði Føroya at siga, at streymurin verður góður, men veðrið verður ikki gott fyrst í vikuni sum kemur, men helst batnar veðrið, sum vikan gongur.
- Vit vænta, at útróðrarbátarnir fara at gera nakrar túrar í næstu viku, og fiskiskapurin hjá útróðrarbátunum er brúkiligur í løtuni, verður lagt aftrat.
