Avgerðin hjá bretska forsætisráðharranum David Cameron, um, at Bretland fer ikki upp í eina nýggja fíggjarpolitiska samgongu innan fyri ES, hevur elvt til ósemju í stjórnini. Alment hevur tann liberaldemokratiski floksformaðurin, Nick Clegg (myndin), sum eisini er varaforsætisráðharri, sagt, at hann styðjar forsætisráðharran, men sambært bretskum fjølmiðlum er hann í øðini um avgerðina hjá Cameron.
-Hetta fer at seta okkum uttanfyri, og tað er avgjørt ikki nakað, sum vit eru áhugað fyri. Nick ber ótta fyri, at Bretland verður tann einsamalli maðurin í Evropa, sigur ein liberaldemokratisk kelda við fjølmiðlarnar.
Á toppfundi í vikuni samdust ríkis- og stjórnarleiðararnir í teimum 17 evrulondunum um at seta í verk fleiri reglur um búskapin og fíggjarpolitikkin í londunum, sum eru við í teirri nýggju fíggjarpolitisku semjuni. Nú skulu londini so tingast um, hvussu hetta skal fremjast í verki.
Av teimum londunum, sum ikki eru við í evrusamstarvinum, er tað bara Bretland, sum longu hevur boðað frá, at landið fer ikki at taka lut í teirri nýggju semjuni. Danmark, Bulgara, Letland, Litava, Pólland, Rumenia, Svøríki og Kekkia hava sagt, at tey fara at leggja málið fyri tjóðartingini, áðrenn tey svara.
