Bátastevnan á Toftum, sum byrjaði við ymiskum tiltøkum longu á middegi í dag, hevur savnað nógvar bátar og nógv fólk til bygdar Um 15-tíðina í dag stevndu út við áttati bátar inn í deksbátahavnina í Oyrunum á Toftum.
Góður og undirhaldandi harmonikutónleikur ljómaði hesa løtu, og tá bátarnir vóru bundnir við bryggjuna, vórðu allar bátsmanningarnar bjóðaðar út í matarhøllina hjá Faroe Seafood (Nyki) til feska suppu og okkurt leskandi.
Væl av fólki hevur verið til ymisku tiltøkini, sum hava verið á skránni seinnapartin í dag og í kvøld og eitt, sum aftur í ár hevur fingið góða undirtøku, eru eftirhondini vælumtóktu festivalbúffarnir, sum verða seldir og borðreiddir afturvið bakaðum eplum, góðari sós og grønmeti.
Í kvøld, tá vit hugdu framvið, vóru bert fáir búffar eftir, og tá høvdu teir báðir slaktararnir, Alberg Gaardlykke og Eyðbjørn Andreasen, sum stóðu fyri matgerðini, stokt heilar 400 búffar.
Í stóra tjaldinum hava teir tríggir, Sámal Ravnsfjall, Hallur Joensen og Martin Joensen, verið á palli.
Meksikansk uppboðssøla av skemtitekning hevur verið, og tá vit vitjaðu, vóru fólk íðin at bjóða upp á hesa.
Stóra brakið á Toftum í nátt verður stórdansur við contrykonginum, Halli Joensen og hansara bólki, sum byrja at spæla í stóra tjaldinum nú klokkan 23.
Tey, sum standa aftanfyri bátafestivalin, hava lagt gólv í ein fittan part av tjaldinum, so dansurin hesaferð gongur fyri seg á timbri - og ikki á asfalti.
- Vit vóna, at nógv fólk koma út higar í dans, nú Hallur Joensen og hansara bólkur fara á pall, siga tey á Toftum.
Pylsuvognurin á festivaløkinum verður opin til umleið klokkan 04.
