Fótbóltur
Enn eru tølini ikki almenn, men sum skilst, vísir roknskapurin fyri 2009 eitt hall upp á seks milliónir krónur.
Av hesum stava tær fimm milliónirnar frá bonus-upphæddini, sum landsliðsspælararnir skulu hava fyri síni avrik í fjør. Enn er tann upphæddin ikki útgoldin, men tað er ein útreiðsla, sum viðvíkur farna árinum, og tí er hon roknað við í roknskapinum.
Í so máta má tað metast heppið, at FSF í fjør gjørdi metsáttmála við Kentaro um sjónvarpsrættindini. Nýggi sáttmálin økti munandi um tær inntøkur, sum FSF hevur av landsliðnum, og tá sáttmálin varð gjørdur, varð millum annað sagt, at hallið fyri 2007 og 2008 nú var fíggjað, og at 2009 skuldi brúkast til at konsolidera FSF við.
Tøki peningurin hjá FSF var tá á leið eina millión, men sambært nevndu tølunum omanfyri, so er hesin etin upp av rakstrarhallinum, meðan tað so enn er ein óloystur spurningur, hvussu skuldin til spælararnar verður fíggjað.
Eginognin hjá FSF var um tær 18 milliónirnar, tá roknskapurin fyri 2008 varð lagdur fram, og er tí væntandi, at hendan nú er komin niður á 12 milliónir ella so.
