Í dag ber til at síggja eina rættiliga sólarmyrking í Norðuramerika, eins og vit sóu í Føroyum 20. mars í 2015.
Tað skrivar amerikanska rúmdarfelagið Nasa á heimasíðuni.
Fullkomna sólarmyrkingin rakar Mexico, USA og Kanada. Í USA byrjar fullkomna sólarmyrkingini í Texas og fer ígjøgnum 13 statir, til hon heldur fram í útnyrðingspartinum av Kanada.
Ein sólarmyrking er, tá sólin, mánin og jørðin eru á einari linju, og mánin á tann hátt skuggar fyri ljósinum frá sólini til jørðina.
Fullkomnar sólarmyrkingar eru sjáldsamar. Tann seinasta í USA varí 2017, men fyri ta tíð skulu vit heilt aftur til 1979. Í Føroyum eru tær enn meira sjáldsamar. Vit høvdu eina í 2015, ta seinastu fyri ta tíð í 1954, og tann næsta verður ikki aftur fyrr enn 26. mai í 2245.
Síðani landnám hava verið sjey sólarmyrkingar í Føroyum:
- 25. mai 849
- 7. juni 894
- 26. juni 1424
- 3. februar 1440
- 30. mai 1612
- 30. juni 1954
- 20. mars 2015
Tað verður leingi at bíða eftir teimum næstu, tí tær verða ávikavist tann 26. mai í 2245 og tann 7. september 2974.
Næsta fullkomna sólarmyrking í USA verður í 2044.
