Ágangurin ímóti donskum politikarum frá Sea Shepherd viðhaldsfólki er stórur í løtini. Paul Watson og hansara fólk hava vent kanónunum ímóti donskum politikarum, tí teir ikki vilja steðga grindadrápi í Føroyum. Túsundtals mótmælisbrøv eru seinastu dagarnar send til fólkatingslimir, og summir politikarar hava fingið upp í 200 teldubrøv um tíman.
Nógv av teldubrøvunum eru ófantalig og ágangandi, og ein av politikarunum er hóttur eftir lívinum.
- Eg havi fingið nakrar hóttanir eftir mínum lívi. Tað eru fólk, sum siga, at tey vilja drepa meg, og fleiri teirra hava greitt frá, hvussu tey ætla at gera tað, sigur Martin Henriksen, sum umboðar Danska Fólkaflokkin, við Politiko.dk.
Sambært honum er tað helst eitt kjak millum hann og Paul Watson, sum hevur viðført hóttandi teldubrøvini.
- Eg skal ikki siga, at brøvini koma frá leiðsluni í Sea Shepherd, men tey koma í øllum førum frá fólki, ið hava tilknýti til hana, sigur Martin Henriksen.
