Lungnasajúkan SARS hevur sambært tíðarritinum Time kostað heimssamfelagnum einar 200 milliardir krónur, síðani hon varð staðfest.
Kanada er tað landið í Vesturheiminum, sum er meinast rakt av SARS, og tað hevur eisini fingið avleiðingar har. Kanadiski íløgubankin J. P. Morgan Securities í Toronto missir einar 200 milliónir krónur um dagin orsakað av SARS, skrivar Time.
Í Asia halda búskaparfrøðingar, at Kina og Suðurkorea fara at missa einar tólv milliardir krónur í part, tí munandi færri ferðafólk fara at vitja tey bæði londini. Í Japan og Hongkong rokna tey við at missa umleið sjey milliardir krónur í part av somu orsøk.
Asiatiski menningarbankin ADB sigur, at búskaparligi vøksturin í Asia fer at minka millum 0,1 og 0,2 prosentstig í ár orsakað av SARS. Bankin sigur, at sjúkan fer kortini ikki at órógva búskapin stórvegis í teimum flestu londunum, og í verður roknað við, at búskaparvøksturin í Asia kortini verður umleið 5,7 prosent í ár.
Sunnudagin doyði ein 79 ára gomul kvinna í Toronto í Kanada av SARS, og har við hevur sjúkan kravt 21 mannalív í Kanada. Kanadisku myndugleikarnir hava skrásett 344 tilburðir av sjúkuni, og av teimum eru 269 skrásettir í Toronto.
Í gjár boðaðu indonesisku myndugleikarnir frá, at har hevði SARS kravt tað fyrsta mannalívið. Samstundis kunngjørdu myndugleikarnir í Vietnam, at teir halda seg hava fingið tamarhald á sjúkuni. Sagt varð, at eingin nýggur tilburður er skrásettur seinastu tríggjar vikurnar.
SARS hevur nú kostað 318 fólkum lívið, og meiri enn 5.000 fólk í 26 londum eru vorðin smittað, síðani sjúkan fyrstu ferð varð staðfest í Kina í november.
