Á Fiskamarknaði Føroya vænta tey, at tvey ísfiskalínuskip koma inn at landa í næstu viku. Bæði skipini hava verið undir Føroyum og hava mest av toski, hýsu, longu og brosmu.
Lagt verður aftrat, at fiskiskapurin hjá línuskipum undir Føroyum er smáligur.
- Eitt ísfiskalínuskip er nýliga byrjað túr í íslendskum sjógvi, men kemur neyvan heim at landa í næstu viku. Tvey frystilínuskip eru eisini í íslendskum sjógvi og koma væntandi heim at landa í næstum.
Restin av línuflotanum liggur við bryggju, men skipini loysa væntandi einaferð eftir páskir.
In.fo kann leggja aftrat, at ísfiskalínuskipið Sandshavið fyrr í hesi vikuni var á veg til Íslands, men teir fingu trupulleikar við pakkdósini til stevnurørið og valdu at venda aftur. Skipið er nú á bedingini hjá Mest í Havn.
- Streymurin verður góður, og um veðurvánirnar halda sær, kann væntast, at nakað verður av útróðri í næstu viku, páskavikuni. Útróðrarbátarnir fáa næstan bara tosk, leggja tey á Fiskamarknaði Føroya aftrat.
